Tāwhirimātea Williams

Nā tōna tipuna kuia a Tāwhirimātea Te Auripo Rewita i whakatipu, ā, i kuraina a ia ki te Kura o Ōmarumutu. Ka hūnuku ia ki te ākau o Tokomaru, ki reira kuraina ai i te taha o tōna pāpā. He kura māhita tōna pāpā. Nō muri mai i tēnā, ka kuraina ia ki te Kura o Whangaparāoa. I mahi tōna pāpā hei tumuaki mō taua kura. Ka kuraina hoki ia ki Mount Albert Grammar School. A muri atu i tēnā, ka ako ia ki Te Kura Kaiako o Tāmaki kia puta hei kaiako tamariki. I reira ka tūtaki atu a ia ki a Bill Tāwhai rātou ko Pat Hōhepa, ko Toby Rikihana, ko Ranginui Walker.

Nuku atu i te 58 tau a Tāwhiri e mahi ana i roto i te ao mātauranga hei kaiako, hei tumuaki, hei kaiako kapa haka hoki. He tangata para i te huarahi mō te whakaako mā te reo Māori anake. He pūkenga tūroa i te kura kaiako anō hoki. Nā rāua ko tana wahine, ko Kaa, i whakatū te kura reo rua tuatahi ki Rūātoki. Ka huri tēnā hei kura reo Māori tuatahi i roto o Aotearoa. Ināianei, ko Tāwhiri te Kaitiaki Huhua i Te Wānanga Takiura o Ngā Kura Kaupapa Māori. He wānanga whakaako i ngā hōtaka rumaki i roto i te reo Māori anake. Kei roto anō te tohu paetahi whakaako tamariki mō ngā kura kaupapa Māori me ngā kura auraki he wāhanga Māori kei roto. I te tau 2016, ka whakawhiwhia a Tāwhiri ki Te Tohu Huānga mō āna mahi hāpai i te iwi Māori, i roto i te ao mātauranga hoki. Ko rāua ko tana hoa, a Kaa, kua whiwhi i ngā Tohu Paerua mai i Te Whare Wānanga o Tāmaki Makaurau. Ko te tohu e whāia ana e rāua ināianei, ko te Tohu Kairangi.

Ka haere koe me tō tokoiti, ka haere mātao. Mehemea ka hoki anō ki roto i te iwi, ki roto i ngā hapū, ki roto i ngā whānau, ki runga i ngā marae, wērā tāngata katoa, anā, ka kōrero koe ki a rātou mō tāhau kaupapa, te otinga ake, ka haere mātotoru te iwi i tō taha, ka haere mahana koe. Anā, ka taea tonu te whakatutuki i taua kaupapa. Ehara ko koe anake me tō tokoiti, engari ko te katoa. Nā reira, he tino tohutohu tērā ki ahau, ā, mau tonu au ki tērā kōrero ināianei